Ne Shqiperi panelet diellore do instalohen me detyrim në çdo shtëpi

Panelet diellore ne Shqiperi do të instalohen me detyrim në çdo ndërtesë, qofshin këto shtëpi private, biznese apo godina zyrtare.

Ministria e Ekonomisë po harton një ligj të ri që ka të bëjë pikërisht me instalimin e paneleve diellore si fillim në institucionet dhe ndërtesat zyrtare dhe më pas në godina biznesi dhe në apartamente. Lajmi është bërë i ditur dje nga përfaqësues të Ministrisë së Ekonomisë gjatë ceremonisë së inaugurimit të paneleve diellore në Shtëpinë e Foshnjës në Sauk.
Projektligji i ri që është hartuar me ndihmën e ekspertëve të huaj, parashikon që hotelet, restorantet dhe ndërtesat e shërbimeve të tjera do të kenë si detyrim që të nisin instalimin në vitin 2014, shtëpitë private individuale në vitin 2015 dhe në vitin 2016, nis detyrimi për ndërtesat shumëkatëshe me apartamente banimi. Edhe pse janë disi të kushtueshme, panelet diellore kanë nisur të përdoren ndjeshëm nga familjet shqiptare, sidomos në zonat bregdetare, por pa përjashtuar këtu edhe shtëpi në fshatra. Qytetarët e kanë kuptuar se ky lloj investimi kursen energji dhe shmang rreziqe. Megjithatë jo të gjitha familjet shqiptare do të kenë mundësi të përballojnë koston e një instalimi të detyrueshëm të paneleve në fjalë. Efektet e krizës ekonomike dhe të ardhurat e pakta në buxhetin e familjeve shqiptare duket se do ndihen edhe më shumë me miratimin e këtij ligji. Sipas të dhënave nga tregtarët e paneleve diellore, kostoja e një paneli mesatar me sipërfaqe kolektori 3 metër katror dhe prodhim 200 litra/ditë ujë, me temperaturë 50-60 gradë kushton deri në 110,000 lekë.
Studimet
Referuar studimeve, Shqipëria rreth 10-13% të totalit të burimeve primare të energjisë, përfshi edhe importin, sigurohet nga biomasa, veçanërisht nga drutë e zjarrit. Përfaqësues të PNUD që po e mbështesin këtë projekt në Shqipëri thonë se aktualisht vendi ynë  mbështetet kryesisht në energjinë hidrike, gjë që na bën të varur nga ndryshimet klimatike, siç është vënë re gjatë periudhës së thatësirës, gjë që më pas ka zvogëluar ndjeshëm furnizimin me energji elektrike. Përballë kësaj situate energjia e rinovueshme mund të jetë zgjidhje për uljen e kësaj varësie, por edhe për sigurinë makroekonomike dhe politike të vendit, duke ulur deficitin e buxhetit të shtetit. Analiza e kryer për Shqipërinë dhe e reflektuar në Planin Kombëtar për Energjinë e Rinovueshme tregon se objektivi final është që të zërë rreth 38 % të konsumit final, nga ku 12% për sistemet e ngrohjeve dhe ftohjeve, 23 % nga burimet e rinovueshme për energjinë elektrike dhe 3% që do të konsumohet në transport. Në projektligjin e ri për Burimet e Energjisë së Rinovueshme është futur një kapitull i ri për nxitjen e sistemeve termike diellore për ujë të ngrohtë. Ky kapitull përcakton një numër masash; ku përfshihen instalimi i detyrueshëm i sistemeve SËH në ndërtesa dhe përfshirja e një detyrimi të tillë në certifikimin e performancës energjitike të ndërtesave; si dhe përjashtimi nga detyrimet doganore dhe TVSH-ja i sistemeve SËH të importuara ose të montuara në vend.

Shtëpia e foshnjës, instalohen panele diellore
Programi i Kombeve të Bashkua për Zhvillim, PNUD ka mundësuar së fundmi instalimin e paneleve diellore në Shtëpinë e Foshnjës në Sauk. Ceremonia e inaugurimit është kryer dje, ku kanë marrë pjesë përfaqësues të PNUD në Shqipëri, të Ministrisë së Ekonomisë, Ministrisë së Punës, Shërbimit Social Shtetëror si dhe stafi i Shtëpisë së Foshnjës. Falë këtij financimi, gati 70 përqind e ngrohjes në godinën ku rrinë fëmijët do të realizohet me anë të energjisë diellore, ndërsa paratë e kursyera do të përdoren për 40 vogëlushët që aktualisht po trajtohen në këtë qendër. Tashmë vëmendja ndaj këtyre fëmijëve të braktisur po rritet gjithnjë e më shumë. Numri i birësimeve është rritur dhe prindërit shqiptar janë zhveshur nga paragjykimet e birësimit të një fëmije jetim. Madje më shumë jetimë po birësohen nga familje shqiptare që kanë edhe fëmijë të tjerë. Sipas Rudina Hoxhës, drejtoreshë e Shtëpisë së Fëmijëve, kjo tendencë është në rritje. Ndërsa për fëmijët romë më shumë interes kanë pasur të huajt, pasi ata kanë më pak paragjykime raciale. “Në birësimin vendas është një gjë që është vënë re në këtë periudhë dhe është për tu vlerësuar që kemi pasur me raste konkrete tre familje që kanë pasur fëmijë biologjikë dhe kanë ardhur e kanë birësuar një fëmijë këtu. Një fëmijë i cili birësohet jashtë territorit të Shqipërisë është fëmijë që mund të jetë me probleme të ndryshme shëndetësore, ose fëmijë me ngjyrë që i përkasin komunitetit rom apo egjiptian”, thotë Rudina Hoxha, drejtoreshë e shtëpisë së fëmijës nga 0-5 vjeç. Vitin që shkoi rreth 30 foshnja u braktisën që në maternitet dhe 17 të tjerë nga prindër që nuk kishin mundësi ekonomike.