Në hyrje të qendrës së Prishtinës ndodhet katedralja e madhe Nënë Tereza, ndërsa vendi ku kërkohet ndërtimi i xhamisë i bie përballë katedrales.
Por ky vend, në të cilin është vënë gurëthemeli nga disa besimtarë, kundërshtohet nga komuna dhe njohësit e urbanizmit.
Dhe kjo për dy arsye, e para se kjo është hapësirë universitare dhe e dyta sepse ndërtimi i xhamisë këtu bie në kundërshtim me planin urbanistik të Prishtinës.
Sidoqoftë, ndërtimi i xhamisë në hapësirën e universitetit nuk do të ishte objekti i vetëm fetar këtu, pak metra më tutje ndodhet kisha ortodokse e cila është ndërtuar në vitin 1991, por që as nuk është rrënuar, ndërsa për arsye politike fati i saj është i papërcaktuar.
Kisha ortodokse për më tepër është ndërtim pa leje por ka në zotërim 1 hektar tokë. Eksperti i urbanizmit Dukagjin Hasimja, dhe njëri nga hartuesit e planit urbanisitik për rregullimin e qendrës 2, tregon se në vendin ku ndodhet UP-ja nuk ka vend edhe për një objekt fetar.
Ndërkaq për katedralen katolike ai thotë se ishte bërë pjesë e planit në mënyrë të imponuar, por nuk ishte e paraparë të ndërtohej me dimensione kaq të mëdha.
“Ne e kemi propozuar me projekt që të ndërtohet një katedrale më e vogël, por nuk është planifikuar ndonjë objekt tjetër fetar, pasi nuk ka logjikë që ai të ndërtohet në kampusin universitar”, deklaron Hasimja.
Askush më nuk e vë në dilemë se qendra e Prishtinës ka nevojë për ndërtimin e xhamisë në të cilën besimtarët do të kryenin ritualet e tyre fetare.
Por i gjithë debati tani është i përqendruar te vendndodhja e saj. Jo të gjithë besimtarët myslimanë në Prishtinë mendojnë se kampusi universitar është zonë e përshtatshme për ndërtimin e xhamisë.
“Do më pëlqente të kisha një xhami në qendër për t’u lutur, por nuk mund të ketë një katedrale, pasi kështu legjitimohet kisha ortodokse që është një forcë e represionit”, shprehet Bashkim Kryeziu, student i Universitetit të Prishtinës.
Teksa të premten besimtarët myslimanë do ta falin sërish namazin në rrugë, komuna e Prishtinës ka intensifikuar takimet për gjetjen e një vendi të përshtatshëm për ndërtimin e objektit.
Bëhet fjalë për rrënimin e një cerdheje e që është edhe kërkesë e bashkësisë islame. Në njoftimin e komunës thuhet se ky lokacion është duke u shqyrtuar por komuna thuhet se ka para vetes edhe disa pika të tjera në qendër.