Lëkundje të forta tërmeti janë ndjerë pak mbas mesnatës së të shtunës në gjithë Shqipërinë e mesme.
Instituti Sizmiologjik ka rregjistruar lëkundje të forta me magnitudë 4. 6 të shkallës rihter.
Në një prononcim për NEWS24 sizmiologu Rrapo Ormëni tha se lëkundjet kanë zgjatur për 3- 4 sekonda. Intensiteti i lëkundjeve ka qenë deri në 6 ballë dhe është ndjerë fort në Elbasan, në Tiranë e në Durrës e në disa qytete të tjera.
Lëkundjet kanë shkaktuar panik tek qytetarët, të cilët kanë dalë të frikësuar nga banesat e tyre. Edhe në qytetin bregdetar të Durrësit, në zonën e plazhit, me të dëgjuar lëkundjet pushuesit kanë lënë banesat dhe i janë kthyer atyre vetëm pas disa minutash.
Sizmiologu Rrapo Ormëni informoi gjatë orëve të natës se epiqendra e tërmetit ishte 15 km në veriperëndim të Elbasanit, në fshatin Shëngjin në të djathtë të rrugës Tiranë- Elbasan.
Shefi i emergjencave civile të Elbasanit ka deklaruar për NEWS24 se ishte vënë në kontakt me kryetarin e komunës dhe është njoftuar se nuk ka pasur dëme materiale, as në fshatin Shëngjin që ishte dhe epiqendra e tërmetit.
Edhe prefekti iqarkut të Tiranës Keltis Kruja ka konfirmuar se nuk janë shënuar të lënduar apo dëme materiale
